عزيزي القارئ: أنا مو لقمان .. أنا طالب في الجامعة الافتراضية، وقصتي قصة .. المهمّ بلا طول سيرة رح أفوت بالموضوع مباشرة فلقد حيَّرونا بهالجامعة الافتراضية ... والله بس حدا يسألني شو عم تدرس وبعدين يعرف أني بالجامعة الافتراضية ـ تكنولوجيا معلومات، بيفكر أني خرقت العقل الالكتروني بالجامعة، وهذا كلّه قبل أن يعرف أن دراستنا كلها على الانترنت، بما في ذلك الفحوص والوظائف. وعلى سيرة الوظائف .. تخيّلوا أنو بكليتي في مادة فلسفة ومادة علم اجتماع، تخيّلوا مادة الفلسفة لحالها، وتخيلوا أنو فيها وظيفة عليها 25% من المعدّل تبع المادة، وبعدين تخيّلوا أنو أنا محمل الوظيفة على الموقع المطلوب، وبعد حوالي الشهرين بنصدم أنو علامتي صفرررررررر، راجعت الجامعة فكان الرد أني شاغل الوظيفة على أوفيس2007 وبعد التأكد من الجامعة أيضاً تبيّن أني شاغلها عالأوفيس2003 (ملاحظة: النظام ما بيستقبل ملفات أحدث من 2003) ثمّ أتى الرد الأسرع أنّي باعت الوظيفة على إيميل الدكتورة، وراجعت الجامعة، وتبيّن أنو هالحكي خطأ، لأني محمّلها عالنظام بالطريقة الصحيحة، وآخر شي تبين مع حضرة الجامعة أني كاتب اسم ملف الوظيفة باللغة العربية!!!.. وبعد السؤال عن الغلط بالموضوع تبيّن أنو في طريقتين أمام أعين الدكاترة ليحمّلوا الملفات المحملة من قبل الطلاب على حواسيبهم الخاصة، ودكتورتنا العزيزة مستخدمة طريقة واحدة فقط، وتبيّن أنو هالطريقة بتشمل الملفات اللي معنونة باللغة الإنكليزية، وبالتالي تمّ اعتبارنا ـ نحن الطلاب ـ الذين أرسلنا وظائفنا معنونة باللغة العربية أنو مو باعتين الوظيفة!! فشو هالجامعة وشو هالدكتورة وشو هالطريقة الجديدة لإهلاك الطلاب، والله شي بيفلج وبيعل وبيموّت..
